ACHÉGASE O NADAL !!!

Como cada ano polo Nadal, o E.D.L.G organiza o CONCURSO DE POSTAIS .

A actividade consiste na elaboración de postais con mensaxes de nadal en lingua galega. Selecciónase unha postal por aula a cal recibe un agasallo ( un libro en galego relacionado coa temática do proxecto: o mundo mariño) e finalmente elíxese a mellor do centro, que se utiliza para felicitar ás familias do centro e aos organismos do Concello. Nos agasallos colabora a ANPA

GRAZAS A TODO O ALUMNADO POLA SÚA PARTICIPACIÓN !

  Estas son as postais gañadoras deste ano. Parabéns a tod@s @s gañadores/as !!!

 

O 17  de decembro o alumnado de 5º de E.P levou a cabo os obradoiros de "Enregueífate" cos regueifeiros Lupe Blanco e Josiño da Teixeira.

Estes obradoiros enmárcanse dentro do proxecto homónimo organizados polos concellos de Ames, Carballo, Pontevedra, Santiago de Compostela e Teo, co que se procura impulsar a improvisación oral en verso e contribuír a través dela á promoción do uso da lingua galega.

Aquí podedes ver unha mostra do que se fixo...

Animámosvos a participar no Certame de regueifas en video. O prazo de presentación é do 20 de xaneiro ao 20 de marzo.

 

O Día Mundial das Personas con Discapacidade, que se celebra cada 3 de decembro, ten como principal obxectivo visibilizar e apoiar a inclusión social e laboral das personas con discapacidade. Este día, que se celebra desde 1992, busca fomentar unha sociedade inclusiva e  accesible, recordando que o 15% da poboación mundial vive con algún tipo de discapacidade.

Beli, a auxiliar técnico educativa do noso centro, contoulles ao alumnado de 5º de E.Infantil o conto de " Por catro esquiniñas de nada" . Un conto de apariencia moi simple e cunha gran lección...De maneira indirecta fala da integración, de respecto do diferente, de cambio de perspectiva, de como a amizade atopa solucións...

Tamén se elaborou un mural conmemorativo sobre diversidade funcional.

 

 

O Día Internacional contra a Violencia de xénero  celébrase anualmente o 25 de novembro para denunciar a violencia que se exerce sobre as mulleres en todo o mundo e reclamar políticas para a súa erradicación.

ESTE DÍA CONVIDÁRONNOS A TOD@S A VIR VESTID@S CON ROUPA DE COR NEGRA PARA DARLLE VISIBILIDADE !

• O LEMA DESTE ANO DO NOSO CENTRO É ...

  "ROMPE COAS REDES DA VIOLENCIA"

• Este é o mural commemorativo que elaborou a alumnado de 5º de E.P.
• 
  
  
  
  
  
• 
  
  
  
  
• 
  

 Cada 20 de novembro conmemoramos  o DÍA DOS DEREITOS DA INFANCIA coa finalidade de contribuír a facer que os dereitos d@s nen@s sexan unha realidade en todos os países do mundo.

Este ano, o alumnado de E. Infantil foi o encargado desta conmemoración e elaboraron un fermoso mural no corredor do centro cos dereitos da infancia.

Ademais, dende a  Asociación Galega de familias de acollida, convídanos cada ano a conmemorar este día propoñéndonos que veñamos ao cole en pixama ou cun obxecto significativo da infancia: peluche, chupete, mantiña... Isto é para representar o momento de intimidade familiara da hora de durmir, nun fogar calquera. 

Con esta iniciativa preténdese facer énfase na importancia do acollemento familiar para garantir o dereito a vivir a familia d@s nen@s... que os que viven en centros non teñen cumprido. 

O alumnado de 6º de E.P participou neste certame literario promovido por “La Voz de Galicia" e o concello de Dumbría para colexios ao longo do camiño de Fisterra a Muxía. 

Váker é un monstruo devorador de peregrinos que se atopa en Dumbría onde o Camiño de Santiago atravesa paraxes de encomparable beleza, bañados polo río Xallas e levados á súa máxima expresión na fervenza do Ézaro. 

 Tratábase de escribir un conto de medo sobre este monstruo....

O pasado 9 de novembro, fíxose a entrega de premios onde, Iria Martínez Mosquera, alumna de 6º E.Primaria do noso centro acada un 5º premio na categoría escolar. Parabéns Iria !!

 

 CHEGOU O MAGOSTO !!

O magosto é unha celebración de orixe celta que forma parte da cultura galega. Nela celébrase a chegada dos froitos de outono. A pesar de que non ten unha data concreta para celebrar, sóese facer entre o 1 e o 11 de novembro e os principais elementos son as castañas e o lume.

No Agro do Muíño, celebramos o magosto o venres 8 de novembro con castañas, xogos tradicionais e moita foliada!

DÍA DA CIENCIA EN GALEGO

O día 4 de novembro, conmemoramos o Día da Ciencia en Galego co obxectivo  de mostrar que a lingua galega é útil e tan válida , como calquera outra para facer pescuda, ensino e divulgación científica.

Este ano dedícaselle á Astronomía , homenaxeando a Galileo Galilei que descubre co seu telescopio toda unha serie de satélites de planetas, detalles da Lúa, ademais de ser un físico relevante  e defensor da teoría heliocéntrica. 

No recuncho do E.D.L.G reservamos un espazo para a ciencia porque...

        "EN GALEGO TAMÉN SE  FAI  CIENCIA"

AO LONGO DO MES DE NOVEMBRO FIXEMOS DIVERSAS ACTIVIDADES...

 O NOSO SAMAÍN !!

Que o SAMAÍN é anterior ao Halloween non é ningunha broma...

Samaín provén da palabra gaélica "Samhain" , que significa " fin do verán" e ten unha explicación e orixe nas tradicións dos celtas, os cales celebraban o final do verán e das colleitas con este rito que perdurou ata os nosos días .

Esta celebración coincide co 31 de outubro e o 1 de novembro e ten un pasado milenario onde se facían ofrendas de froitos en honor aos nosos antepasados e un banquete que recordaba aos nosos mortos.

No noso centro, na semana do 28 ao 30 de outubro, celebramos o Samaín cunha exposición de caveiras elaboradas polas familias e cunha gran festa .

GRAZAS A TODAS AS FAMILIAS POLA SÚA COLABORACIÓN!

Benvid@s ao blog do E.D.L.G deste curso 2024-25 !

O proxecto deste ano leva por título "Mergúllate no galego a través da Ciencia"

O obxectivo prioritario do equipo será promover e potenciar o uso do galego en toda a comunidade educativa e en todas as actividades de centro  para garantir unha boa competencia lingüística ao noso alumnado.